Dec 22, 2020

గ్రేట్ వాల్ ఆఫ్ అమెరికా

ఒక వైపు కోవిడ్ విఝృంభణ
మరోవైపు మృత్యుహేల
పిట్టల్లా రాలిపోతున్న జనం
కిం అనని ప్రభుత

అలా పక్కన పెడితే
మాస్క్ పెట్టుకోం అని వాదించే మూర్ఖులు

అలా పక్కనపెడితే
రోజురోజుకీ పెరుగుతున్న నిరుద్యోగం
ఉద్యోగాలు కోల్పోతున్న కార్మికులు

నెలాకరుకి అద్దె కట్టలేక రోడ్డున పడనున్న బతుకులు
ఇప్పుడే ఇలా చేయాలా అనిపించేలా వణికిస్తున్న చలి తీవ్రత

అబ్బెబ్బే కోవిడ్ అంతా ఉత్తిదే అంటు జనాన్ని చీకట్లోకి నెట్టి
టికా రాంగనే సేనని పక్కకి నెట్టి పొడిపించుకుంటున్న రాజకీయ రాబందులు 

పక్కనపెడితే 
జనానికి అండగా నిలవాల్సిన ప్రభుత్వం ప్రతిపక్షంతో *స్టిమ్యులస్ డీల్*

ఒక పక్కన జనాలు ఫుడ్ సెంటర్స్ దగ్గర గంటలు గంటలు బారులుతీరి నిల్చుంటున్నారు

జనాలు నీ ముఖాన్ని గెలిపించలేదంటే
కోర్టుల్లో కల్లబొల్లి కబుర్లు చెప్పటానికి $207 బిలియన్ డాలర్లు సేకరించిన అధ్యక్షుడు

అన్నార్తుల ముఖాన $600 స్టిమ్యులస్ చెక్ కొట్టటనికి డీల్

మరోవైపు తుమ్మితే ఊడిపోయే ముక్కులాంటి ఇనుప గోడకి $1.375 బిలియన్ డాలర్ల ఉద్దీపన

ఎవరి కన్నీళ్ళు తుడవటానికీ?
ఎవరి జేబులు నింపుకోటానికీ?

Dec 13, 2020

మాస్క్ పెట్టుకోవటం అనేది హక్కు

ముఖానికి మాస్క్  పెట్టుకుంటే కోవిడ్ సంక్రమించ కుండా ఆపలేమేమో కానీ కనీస జగ్రత్తకీ ఉపయోగపడచ్చు. ఈవిషయాన్ని చెప్పటానికి పి.హెచ్.డి చెయ్యాల్సినా పని లేదు. చిన్న చిన్న జాగ్రత్తలు మనల్ని మనం కపాడుకోటానికి ఉపయోగపడతాయి అని చెప్పటానికి డా||ఫౌచి ఇంటింటికి వెళ్ళో లేక ప్రతీ మనిషికీ ఫోన్ చేసో చెప్పల్సిన పనిలేదు.


ముఖానికి మాస్క్ వేసుకోటం అనేది ఒక మనిషి తనకు తనుగా స్వచ్ఛందంగా చేయ్యాల్సిన ఆచరించాల్సిన సమాజిక బాధ్యత కనీసం ఈ రోజుల్లో.


మాస్క్ పెట్టుకోవటం అనేది హక్కు.


ఘోరం ఏవిటంటే మాస్క్ పెట్టుకోవటాన్ని పెట్టుకోండని చెప్పటాన్ని పెట్టుకోకపోతే ఏదోలా పెట్టుకునేలా చేసే ఆలోచననీ రాజకీయం చేసేశారు కొందరు. దానికి కొన్ని వార్తా సంస్థలు వత్తాసు.


నిన్న రాత్రి వాషింగ్‌టన్ లో జరిగిన సంఘటన - కార్లో వెళుతూ మాస్క్ పెట్టుకున్నారని ఆపారు ప్రౌడ్ బాయిస్ అనే ఒక ట్రంప్‌ని మోసే గుంపు. వీళ్ళ దృష్టిలో మాస్క్ పెట్టుకున్నవాళ్ళు ట్రంప్ ని వ్యతిరేకించేవాళ్ళు.


భయంగొలిపే సంఘటన.


Dec 8, 2020

ట్రంపిజం

ఆనాడు డ్యూటీలో ఉన్న ఒక ప్రభుత్వ ఉద్యోగి అందునా ఒక స్త్రీ మీద చేయిచేసుకుని పదవని కోల్పోయి తన ఉనికినే కోల్పాయాడు ఒక మంత్రి. 

ఈనాడు తన బాధ్యతను తాను నిర్వర్తించినందుకు ఈమె ఇంటి మీదకు తుపాకులతో వేళ్ళారు దుర్మార్గులైన కొందరు.

ఒక దొంగ పుట్టుకతో దొంగ కాడు, ఒక దొంగ తయ్యారు కాబడతాడు.

ఒక దేశాధ్యక్షుడు పుట్టడు, తయ్యారుకాబడతాడు ప్రజాస్వామ్య వ్యవస్థలో. (మన కర్మ మనదేశంలో ఇంకా కుటుంబ పాలనలో మగ్గుతున్న రాజకీయ కుటుంబాలున్నాయనుకోండి)


ఈమె పేరు జోసిలిన్ బెన్‌సన్, మిషిగన్ రాష్ట్రానికి సెక్రెటరి. రాష్ట్ర సెక్రెటరి ఇంటి మీదకే వేళ్ళారంటే వీళ్ళు ఎంతలా ప్రేరేపితం కాబడ్డారో?

వీళ్ళు ట్రంపిజాన్ని మోస్తున్న సైనికులు అని వేరేగా చెప్పాల్సిన పనిలేదు. తప్పు వీళ్ళదా? వీళ్ళని ప్రేరేపిస్తున్న వ్యవస్థదా?

తప్పు చేసేవాడిదే చేయించేవాడిదా?

తప్పు గొఱ్ఱెదా కాసేవాడిదా? 

ఇంత జరిగినా రిపబ్లికన్ పార్టీ నుంచి గానీ, దేశాధ్యక్షుడి నుంచి గానీ దీన్ని ఖండిస్తూ ఎక్కడా ఒక్క స్టేట్మెంట్ లేదు.

Jocelyn Benson just released a statement: “As my four year old son and I were finishing up decorating the house for Christmas on Saturday night ... dozens of armed individuals stood outside my home shouting obscenities and chanting into bullhorns in the dark of night.”

 

Nov 18, 2020

తాతగారి ట్వీట్స్

తాతగారి ట్వీట్స్ లో లాజిక్ అర్థం అవ్వలెదు.

రిగ్గింగ్ జరిగింది అంటాడు - అర్థమైంది.

కాబట్టి నేనే గెలిచాను అంటాడు. అదెలా? 

 

Nov 8, 2020

ఎన్నికల వ్యవస్థలో సమస్యలున్నాయా?

 గెలిచినప్పుడు వ్యవస్థ బ్రహ్మాండంగా పని చెసిందనీ, ఓడినప్పుడు వ్యవస్థ దొందగదనీ లేక లంచగొండిది అనీ అభాండాలు వేసే నాయకులను తరిమితరిమి కొట్టాలని నా పిలుపు.

ఉదాహరణకు ట్రంప్ - 

నేను గిలిస్తే ఒప్పుకుంటాను.

ఓడితే మాత్రం ఒప్పుకోనని 2016 అన్నాడు.

సరే! గెలిచాడు. 4 ఏళ్ళు కుర్చీలో కూర్చున్నాడు.

ఇప్పుడు ఓడిపోయాడు. ఇప్పుడు ఎన్నికల వ్యవస్థలో వ్యవస్థాగతమైన సమస్యలున్నాయంటాడు.

4ఏళ్ళు  పాలించినప్పుడు ఈ సమస్యలని తూర్పారపట్టి సరిదిద్ది ఉండచ్చుగా? ఈ వ్యవస్థలని ఒక గాట్లోపెట్టి ఉండచ్చుగా?

అబ్బే లేదు. ఇలా ఏళ్ళకు ఏళ్ళు ఏడవటమే! వ్యవస్థ సరిగ్గా పని చేయలేదని కేవలం నెపం.



Oct 30, 2020

గ్రీసు/టర్కీ దేశాలల్లో భూకంపం

గ్రీసు/టర్కీ దేశాలల్లో భూకంపం


"జర్మనీలో భూకం వచ్చిందటరా. సునామి వచ్చిందట. గ్రీస్ అనే దేశంలో కూడా వచ్చిందట" అంటూ అమ్మ ఫోన్. 

సర్ది చెప్పటానికి ప్రయత్నించాను. టెన్షన్ పడకూ అని.


గ్రీస్ తో నా అనుబంధం మనసులో మెదిలంది.

2000 సంవత్సరంలో ఓ సారి గ్రీస్ వెళ్ళాను. హోలార్గోస్ అనే ఊళ్ళో బస ఇచ్చారు. నేను ఉన్న ఇంటి ఓనర్ పేరు దిమిత్రి. అతను కొంత కాలం కొత్త డిల్లీలో ఉన్నాట్ట. భారతీయులంటే అదొక అనుబంధం అని చెప్పుకొచ్చాడు.

నేను పని చెసిన ఆఫీసు కిఫిసీస్ ఎవెన్యూలో ఉండేది. బస్సులో వెళ్ళి, మైలు దూరంలో దిగి నడుచుకుంటూ వెళ్ళేవాణ్ణి.

గ్రీస్ లో కొందరు పరిచయం అవ్వటం వాళ్ళతో సాంస్కృతిక చర్చలు జరగటం - ఓ జ్ఞాపకం.


అక్కడ పరిచయం అయిన మిత్రులు ఆక్రొపొలి దగ్గర్లో ఉన్న ఒక గ్రీక్ ట్రడిషన్ల్ బుజీకి క్లబ్ కి తీసుకెళ్ళటం, క్లబ్బులో గ్రీక్ పాటలు బుజూకి సంగీతం ఆశ్వాదించటం, పాట నచ్చితే పింగాణి ప్లేట్లు నేలకేసి పగలగొట్టి ఆనందాన్ని సంతోషాన్ని వెలిబుచ్చాలనే విషయం తెలిసి తెల్లబోవటం ఓ జ్ఞాపకం.

గ్రీకులు తమ సంస్కృతిని తమ పురాణ ఐతిహాసాలని గొప్పగా చెప్పుకోవటం, కొత్తతరం పాతతరం సంస్కృతిని ఎలా మిళితం చేసుకున్నాయో చూసి ఆశ్చర్యపోవటం - జ్ఞాపకం.

గ్రీకు భాషకి, సంస్కృతానికి సంబంధాలు - మాత్రోస్/మాతా, పిత్రోస్/పితా లాంటి పదాల సారూప్యత. గ్రీకు దేవుళ్ళు/హిందూ దేవుళ్ళు ఇత్యాది అనేక సారూప్యతల గురించి చర్చలు - ఒక జ్ఞాపకం.


అనేక జ్ఞాపకాలు మదిలో మెదిలాయి.

అక్కడి జనుల క్షేమం కోరుతాను.


Oct 28, 2020

కోవిడ్ గోప్యత


"ఎవరితో అనవాకు గానీ, పలానీ వాళ్ళకు కోవిడ్ వచ్చిందట. ఇప్పుడిప్పుడే తగ్గుతున్నదట. వాళ్ళు ఎవరికీ చెప్పటం లేదు" అన్నది అమ్మ.
"అమ్మా! నువ్వు జాగ్రత్త! ఎక్కడకీ పోవాకు, ఎవర్నీ రానివ్వవాకు" అని సర్ది చెప్పాను.
"భయంగనే ఉంటున్నదిరా!" అంటుంది అమ్మ.


ఒక నిమిషం ఏం చెప్పలో పాలుపోలేదు.
కొవిడ్ సోకిన వాళ్ళు ఎందుకు దాచిపెడుతున్నారు వచ్చిందనీ?
దాని వల్ల కలిగే లాభం ఏంటీ?
కోవిడ్ వస్తే వచ్చిందీ అని చెప్పుకుంటే జరిగే నష్టం ఏంటీ?
పలు ప్రశ్నలు మనసులో. 
కోవిడ్ వస్తే వచ్చిందని చెప్పుకుంటే పక్కన వాళ్ళు కాస్త జాగ్రత్త పడతారు కదా?
అది కనీస బాధ్యత కదా అని నా అభిప్రాయం.
దాచిపెట్టటం వల్ల లాభం నాకు అవగతం అవ్వటం లేదు.
ఎందుకు దాచాలీ? వచ్చిందీ అని చెప్పుకుంటే జరిగే నష్టం ఏంటీ? ఇదిమిద్ధంగా జవాబు తట్ట లేదు. 

మా పక్క సందులో ఓ దేశీ. గత రెండు నెలలుగా అతను కనిపించలేదు. ఆమె పిల్లాడిని బైకింగుకి గట్రా తీసుకెళ్తున్నది. ఓ నెలన్నర క్రితం ఆమె ఎదురై బాగున్నారా అని పలకరించింది. క్షేమసమాచరం అయ్యాక చెప్పింది వాళ్ళ మామ గారు పోయారు, ఆమె భర్త అంత్యేష్ఠికి కోయంబత్తూరు వెళ్ళాడని చెప్పుకొచ్చింది. ఆమె మామగారు కోవిడ్ వల్ల పోయారని చెప్పింది.

మా అమ్మ గారు హ్యుస్టన్ వచ్చినప్పుడు రోజూ 15000 అడుగులు వేసేది/నడిచేది. పొద్దున కొంచెంసేపు, సాయంత్రం కొంచెం సేపు. సాయంత్రపు నడకలో సదరు మామగారు మామీ గారు మ అమ్మగారికి నడక మిత్రులు. వాళ్ళు వచ్చీరాని తమిళతెలుగులో మాట్టాడటం మా అమ్మ తెలుగులో దంచికొట్టడం. మంచి మిత్రులు. ఆయన పోయారని వినటం బాధగా అనిపించింది.

అమ్మకి చెబితే తనూ కాసేపు బాధపడి భయపడింది కూడా.

రెండ్రోజుల క్రితం అతను కనిపించాడు. నాన్నగారు కాలం చేశారని తెలిసింది, వారి అత్మ శాంతి అన్నాను నా ధోరణిలో. అవును బాధగా ఉందీ. అసలు ఏంజరిగిందంటే - కోయంబత్తూరులో వీళ్ళ నానగారి ఇంటి ముందు ఓ డాక్టరు. ఓరోజు స్దరు డాక్టరు వీళ్ళ నాన్న ఏదో రచ్చబండ దగ్గర చర్చ, రెండు గంటలపాటు. ఇంటికొచ్చాక డాక్టరు ఫోన్ - కోవిడ్ లక్షణాలు కనిపిస్తున్నాయి, టెస్ట్ పాజిటివ్, మీరూ చేయించుకోండీ అని. ముసలాయన చేయించుకున్నాడు - పాజిటివ్ అని తేలింది.

ముసలాయన భయపడ్డాడు. ఆశుపత్రికి వెళ్ళాడు. వాళ్ళు చేర్చుకుని మూడు రోజులుంచుకుని మందులు అవి ఇవీ ఇచ్చి డిస్ఛార్జ్ చెసి పంపించారు. కోయంబత్తూరులో కోవిడ్ డిస్ఛార్జ్ విధానం ప్రకారం - రోగి ఇంటికి వెళ్ళి సెల్ఫ్ క్యారెంటీన్ అవటానికి అల్యూమినం షేట్ తో గది కట్టి, దాని మీద పోస్టర్ వేస్తారట. జాగ్రత్తలు రాస్తారట. ఇంటి బయట పోస్టర్ - ఈ ఇంట్లో కోవిడ్ సోకిన వ్యక్తి ఉన్నాడు అని. సరే - డిస్ఛార్జ్ అయ్యాక ఇంటికొచ్చి మందులేసుకుంటున్నాడు. ఇంతలో ఎవో కొన్ని కాంప్లికేషన్స్. క్యారెంటీన్ లో ఉంటంవల్ల సరైన డాక్టర్ సదుపాయం అందకపోవడం వల్ల 13 రోజున పోయాట్ట. అటాప్సీలో ఆర్గాన్ ఫైల్యూర్/ లంగ్ ఫైల్యూర్ అని రాసారట.

కోవిడ్ వల్ల మరణాలు సంభవించాయని చూశాం. కాని కోవిడ్ తగ్గినాక కూడా దాని ప్రభావం వల్ల మరణం సంభవించతం కాస్త భయం గొలిపిదిగా ఉంది. బాలసుబ్రహ్మణ్యం/ద్రోణంరాజు/ఈ ముసలాయన అంతా అలా పోయిన వాళ్ళే.

మొన్నోరోజు ఆకాశవాణిలో ఒక ముఖముఖీ విన్నాను. కోవిద్ వచ్చి ఇంటికి క్షేమంగా తిరిగివచ్చిన దాసరి నాగరాజు గారితో పరిచయం:
నాగరాజు గారూ మీకు కోవిద్ వచ్చిందని ఎలా తెలిసింది?
నాకు 105 జ్వరం వచ్చింది. డెంగు మలెరియా లాంటి పరిక్షలు నెగెటివ్ వచ్చాయి. అప్పుడు డాక్టరు కోవిడ్ పరీష చేయించుకోమన్నాడు. పాజితి వచ్చింది. ఆశుపత్రిలో చేతితే రోజుకి లక్ష ఖర్చు. ఈంట్లోనే సెల్ఫ్ క్యారెంటీన్ అవ్వండి అని డాక్టరు సలహా పాటించి ఇంట్లోనే ఒక గదిలో ఉండిపోయాను. డాక్టరు ఇచ్చిన మందులు తూచా తప్పకుండా పాటించాను.
"పారాసెట్మాల్ 650ంగ్, మల్టి విటమినులు, పొద్దునా సాయంత్రం కషాయం. 
పొద్దున 30 ప్రాణాయామం, 30 నిమిషలు యోగా"
డాక్టర్లు చెప్పింది చెప్పినట్లు పాటించాను 12 తగ్గింది 
ఇదీ దాసరి నాగరాజు చెప్పిన విషయం.


ఇక మా ఆఫీసులో కొందరు మిత్రులు. రెండు వారాలుగా కనిపించకపోవటం. కనిపించాక, ఏంటి గురూ అంటే కోలుకుంటున్నా అని అనటం. ఎక్కడనుంచీ ఏవైందీ అంటే కోవిడ్ నుంచి అని - నాలుగైదు కేసులు.
అందులో ఒకతనికి పాపం కాస్త ఇబ్బంది అయ్యింది. హాస్పిటలైజ్ అయ్యాడు కూడా. సారాంశం - కోవిడ్ శ్వాసకోశ వ్యవస్థని దెబ్బతీస్తుంది. పై నలుగురు చెప్పింది - జ్వరం రాక పోక పక్కన పెడితే లంగ్ లో ఇంఫెక్షన్ రావటం నలుగురికీ కామన్ విషయం. FAVIPIRAVIR/Amoxicillin/Paracetamol/Multivitamins ఇవీ అందరూ వేసుకున్న మందులు.

నవంబర్ వచ్చెసింది. కోవిడ్ మందు ఇక ఎంతో దూరంలో లేదు అని ఆశావహ ధృక్పథంతో అందరు పెద్దలూ ఉన్నారు.

Oct 25, 2020

చిన్న అభిప్రాయ సేకరణ

హరి యస్ బాబు వాదన - బ్లాగు అనేది రీసెర్చ్ చేసి కేవలం నిరూపితమైన సరుకు మాత్రమే రాయాలి.
బ్లాగులో అభిప్రాయం అనేదానికి తావులేదు
తన అభిప్రాయాని ప్రకటించే హక్కు బ్లాగరికి లేదు
అభిప్రాయాల్ని వెలిబుచ్చే బ్లాగు కెవలం ట్రాష్ బ్లాగు
రీసెర్చ్ చేసి ముద్ర వేయించుకున్న బ్లాగులే గొప్పవి

నా అభిప్రాయం - నా బ్లాగు నా అభిప్రాయాలని తెలుపుకోటానికి. నేను ఒక వార్త చదివి నాకు అర్థమైన దానిపై నా అభిప్రాయాన్ని ప్రచురిస్తాను. రీసెర్చ్ చేసే అవసరం సమయం వనరులు నాకు లేవు. 

నా అభిప్రాయాని నా బ్లాగు ద్వారా పంచుకుంటాను. నా అభిప్రాయం ల్యాండ్మార్క్ కాదు. నా అభిప్రాయం ఒక విమర్శ. కాని కువిమర్శ కాదు.

అభిప్రాయ సేకరణ:

నా అభిప్రాయాన్ని తెలిపే హక్కు నాకున్నదా లేదా?

ఒక అభిప్రాయానికి రావటానికి పీహెచ్‌డి చెయ్యాలా?


Oct 21, 2020

*జగన్ లేఖ #ట* గాళ్ళకు ఈ వీడియో

 *జగన్ లేఖ #ట* గాళ్ళకు ఈ వీడియో


గత వారంగా కొట్లాటలు దొమ్మీలు వార్తాఛానళ్ళలో. ఓ కుమ్ముకుంటున్నారు. బాకా పత్రికలు బాకాలూదటం.

బాకా ఛానళ్ళలో డప్పులు వాయించటం.


వాటికి ముక్తాయింపులు సదరు వార్తా పుత్రికల సంపాదకులు చట్టాలను న్యాయాన్ని తూర్పారపట్టినట్టుగా ఫీల్ అవ్వటం. పీహెచ్‌డి చేసినట్టు దస్తాలకు దస్తాలు సంపాదకీయాలు రాసి అక్కసు కక్కోవటం.


న్యాయ వ్యవస్థ మీద ఆరోపణ చేయకూడాదా? ప్రశ్నించే హక్కు రాజ్యాంగం ద్వారా ప్రాప్తించిందేగా?

సరే ఏవైనా ఈరోజొక యూట్యూబ్ వీడియో చూశాను. నాకు బాగా నచ్చి ఇక్కడ అందిస్తున్నాను.

Oct 17, 2020

పద వినోదం #2

 




అడ్డము:
1. నిజ ఆశ్వయుజ మాసంతో ఇవి మొదలు
5. ఇలా అడిగితేనే మీకు మాత్రమే చెబుతాను అనే సినిమా తీశారు 
7. ప్రాణి, జీవించువాడు
8. నల్లగుడ్డు
10. సారథి నడుపునది
12. పూర్ణచంద్రుడు గల పున్నమి
13. _ _ శాంభవి చంద్రమౌలిరబలా!
15. రేగిన కోరికలతో గాలులు వీచగా..
జీవన వేణువులలో మోహన పాడగా
దూరము లేనిదై లోకము తోచగా..
కాలము లేనిదై గగనము అందగా..
ఈ సినిమలోనిదే ఈ వేటూరి శృంగార రచన
16. సుక్ష్మము
21. దీనికి చక్కలిగింతలు పెట్టాట్ట వెనుకటికి ఎవడో

నిలువు:
2. మంత్రి
3. ఈ చెట్టు నారాయణుడితో సమానమే!
4. లూజైన మంచం ఇది ఆడిందట, కానీ ఒక్కసరేనండోయ్.
5. నాలుగు టంకముల ఎత్తు బియ్యము పట్టు పరిమాణము
6. మహాకవి కాళిదాసు సినిమాలో కాళిదాసు హనుమంతుడిని ఈ రాయుడు అనిపిలుస్తాడు చమత్కారంగా
9. మంగళహారతి
10. ఇదొకరకం తెలుగు పద్యం
11. కిం గోత్రమహమస్మి, అంబా! కిం గోత్రమహమస్మి? అంటా ఈ అబ్బాయి వాళ్ళమ్మ సత్యకామతో
13. కీలుగుఱ్ఱం సినిమలో ఈమె యక్ష రాక్షసి గుణసుందరిగా వేసింది
14. ఈయన్ని చూసిన కంట మొగుణ్ణి చూస్తే మొట్టబుద్ధేస్తుందట
18. కీర్తి లాంటిదే
19. ఉమామహేశ్వర రావు ఈ రూపం అంటూ ఓ సినిమా వచ్చిందీమధ్య
20. చేత్తో కొలిచే ఓ కొలత

Oct 16, 2020

శ్రీ(శ్రీ)-రంగా

ఆచార్య NG రంగాకీ శ్రీశ్రీకి సైద్ధంతిక వ్యతిరేకత ఉండేదేమో. ఒకరు కాంగ్రేసు మరొకరు కమ్యూనిస్టు.

శ్రీశ్రీ రంగా మీద కొన్ని ఘోరమైన మాటలు రాసుకొచ్చాడు. కొన్ని(అన్నీ) నిజం అయుండచ్చు కూడా.
కాంగ్రేస్ అనే కప్పల తక్కెడలో అవకాశావాదులే ఎక్కువ గాంధేయవాదులకన్నా అని ఒక అపవాదు ఉండనే ఉంది.
ఈ వ్యంగ్యాలు చిన్న చిన్న స్నిప్పెట్స్. ఇవి వ్యంగ్యాలు అనేకన్నా కిక్ రియాక్షన్స్ అంటే బాగుంటుంది. ఈ విషయంలో నాకు శ్రీశ్రీయే స్పూర్తి అనుకోవచ్చు. వార్తాపుత్రికని చూట్టం ఉడికిపోయి ఒక టపా వేయతం - శ్రీశ్రీ నేర్పిన విద్య.
విషయంలోకొస్తే -

*ఆంధ్రదేశంలో సైనిక పాలన అవసరం* - శ్రీ రంగా 30-04-1950, ఆనందవాణి 

శ్రీశ్రీ వ్యాఖ్య -
ఘోరంగా
క్రూరంగా
ఛీరంగా
థూరంగా

*అఖిల భారత చేనేత కాంగ్రేసు మహాసభ - రంగాగారి అధ్యక్షతన* - విజయప్రభ పత్రిక 

శ్రీశ్రీ వ్యాఖ్య:
రామప్ప పంతులు పప్పు లేని పులగం లేదనట్లు 
అఖిల భారత - ఏదైనా సరే ఆచార్య రంగా ఉండాల్సిందే

*ఒరుగులుగా, పొరుగులుగా, ఊరగాయలుగా! పొడిగా ఉప్పుతో నానవేయడం ద్వారా, రసరూపేణా పండ్లను నిల్వ చేసే విధానాలను కనిపెట్టాలి* - ఆచార్య రంగా

శ్రీశ్రీ వ్యాఖ్య:
ఇంత మధురమైన గేయానికి ఎవరైనా సంగీత దర్శకుడు స్వరం అవీ వేసి ఆర్కెష్ట్రాతో పాడిస్తే ఎంత బాగుండును!

*కొందరు కాంగ్రేసువారే, శాసనసభ్యులే సేవాదళమును రజాకార్లవలె రంగాకార్లనుచున్నారట, ఇది ఎంత సిగ్గుచేటు* - రంగా
శ్రీశ్రీ వ్యాఖ్య:
సిగ్గూచేటు కాదు, గర్వించదగ్గ విషయం. చరిత్రలో కాకపోతే కనీసం నిఘంటువులో అయినా మన పేరెక్కుతుంది ప్రొఫెసర్ జీ!

(ఆంధ్ర ప్రాంతంలో రంగా అనుకూలురు హోంగార్డ్స్ వలె సేవాదళంలా ఏర్పడి కమ్యూనిస్టులను పట్టివ్వడంలో పోలీసులకు తోడ్పడేవారు కనుక వారిని అపట్లో రంగాకార్లు అని పిలిచేవారు)


*ఆచార్య రంగ గారి రాజకీయాలకు, తిరునాళ్ళలో తిరిగే రంగుల రాట్నాలకు ఎలాంటి బేధం లేదు* - నవయుగం పత్రిక

శ్రీశ్రీ వ్యాఖ్య:
ఉంది. అది రంగుల రాట్నం, ఇది రంకుల రాట్నం
ఆనందవాణి ముద్రణ, 04-06-1950

(పైవన్నీ వారంవారం అనే పుస్తకం నుంచి)

Oct 13, 2020

ఎవరు చెప్పాలి ఈ ప్రజాప్రతినిధులకు?



ప్రజలతో ఎప్పుడూ మమేకమయ్యే MLA రోజా ఈరోజు 108 ఆంబ్యులెన్స్ వాహనాన్ని నడిపిందంటూ ysrcp బాకా పత్రిక ఓ వార్త రాసుకొచ్చింది.

తప్పు లేదు. ఏ గూటి చిలక ఆగూటి పలుకే పలుకు. ఏ ఇంటి పుత్రిక ఆ ఇంటి పలుకే పలుకు.

అయితే - నాకు అర్థం కానిది - ఒక MLA అయుండి, జనాలకి ఆదర్శంగా నిలవాల్సిన ఒక MLA ఆంబ్యులెన్స్ లాంటి వాహనాన్ని చోదిస్తూ - seat belt పెట్టుకోకపోవటం? సాక్షి ఆ విషయాన్ని నిలదీస్తూ రాసుంటే సాక్షి పుత్రికని పత్రికలా ఆహ్వానించేవాడిని. కానీ - సాక్షి పుత్రికలానే మిగిలిపోయిందింతవరకూ!


ఎవరు చెప్పాలి ఈ ప్రజాప్రతినిధులకు?

ఎవరు చెప్పాలి ఈ సెలబ్రిటీలకూ?


మీ ప్రాణం పోయినా పర్వాలెదు. మీ ప్రాణం మీ ఇష్టం. కానీ పక్కనోడి ప్రాణాన్ని తీసే హక్కు అధికారం మీకు లేదు.


నాయకులే సీటు బెల్ట్ పెట్టుకోకపోవటం సిగ్గుచేటు.



 #justasking

Oct 8, 2020

వస్తా వట్టిదే పోతా వట్టిదే

కొలువు ముగించి నడకకి బయల్దేరాను
బెల్లం చుట్టూ మూగిన చీమల్లా
ఆలోచనలు మూగినై మనసు మీద
రేడియో పెట్టుకున్నాను 
తత్వాలు వస్తున్నా భక్తి రంజనిలో
కీశే శ్రీ మంగళంపల్లి బాలమురళీకృష్ణ గారి గళంలోంచి స్వీయ రచన 
తుమ్మి పువ్వులు తెచ్చి నీకు తుష్టుగా పూచేదమంటే... ఓహో
తుమ్మి పువ్వులు తెచ్చి నీకు తుష్టుగా పూచేదమంటే... ఓహో
కొమ్మ కొమ్మకు కోటి తుమ్మెద ఎంగిలంటున్నాది లింగా
తుమ్మి పువ్వులు తెచ్చి నీకు తుష్టుగా పూచేదమంటే
కొమ్మ కొమ్మకు కోటి తుమ్మెద ఎంగిలంటున్నాది లింగా
కొమ్మ కొమ్మకు కోటి తుమ్మెద ఎంగిలంటున్నాది లింగా
మహానుభావా... మా దేవ శంభో
మా లింగ మూర్తి
ఏమి సేతురా లింగా, ఏమి సేతురా
ఏమి సేతురా లింగా, ఏమి సేతురా
ఏమి సేతురా లింగా, ఏమి సేతురా
ఏమి సేతురా లింగా, ఏమి సేతురా
మనసు బాలమురళిగారి తత్వంలో మునిగిపోయింది
అంతలో - తర్వాతి తత్వం

వస్తా వట్టిదే  
పోతా వట్టిదే  
ఆశ ఎందుకంట
చేసిన ధర్మము 
చెడని పదార్ధము 
చేరును నీ వెంట
చేతిలో అమృతము 
ఉన్నంత సేపే 
అన్నదమ్ములంట
ఆఘాధంబై  
పోయేనాడు  
ఎవరురారు  వెంట
వస్తా వట్టిదే  
పోతా వట్టిదే  
ఆశ ఎందుకంట
చేసిన ధర్మము 
చెడని పదార్ధము 
చేరును నీ వెంట

పంచ భూతముల
తోలు బొమ్మతో
ప్రపంచమాయనట
అంతము వరకు
కించిత్ ఆ శ తో 
పెంచెను జగమంతా

వస్తా వట్టిదే  
పోతా వట్టిదే  
ఆశ ఎందుకంట
చేసిన ధర్మము 
చెడని పదార్ధము 
చేరును నీ వెంట

ఈ మాటలు - చేతిలో అమృతము 
ఉన్నంత సేపే 
అన్నదమ్ములంట
ఆఘాధంబై  
పోయేనాడు  
ఎవరురారు  వెంట
- వినగానే ఒక్క నిమిషం 
సాయంత్రం మసకి చీకటిలో బావురుమని ఏడ్చాను
హృదయం వికలమైంది
బరువెక్కిపోయింది
ఎంత పచ్చి నిజం

పద వినోదం

 


అడ్డం

1. మంచానికి కిందకాళ్ళకట్ట - మరి పైన

3.కర్ణాటకలో ఖ్యాతిగాంచిన ఓ ఊరు. ఆంగ్ల ఆమెతో మొదలు.

5. అడవిలో అగ్గి అటునుంచి రాసుకుంది

6. మట్టిని కాల్చి ఇల్లుకట్టేది కాస్త ఉల్టాపల్టా అయ్యింది.

8. కొంకణ్ గా పిలువబడే ఈ చిన్న రాష్ట్రం బీచ్ లకు ఖ్యాతి గాంచింది

10. తడబడ్డ నెఱ్ఱె

12. తినేదాంట్లో ఇది ఉంటే మధుమేహం చెప్పుచేతల్లో ఉంటుందని డాక్టర్లు చెబుతుంటారు

14. ఔన్సులు - తెలుగు కొలమనంలో

15. ఇంట్లో వండటానికి ఏమీ లేవని ఆమె అంటే, బయట పచ్చగా ఉన్నదాంతోనే వండమన్నాట్ట ఓ పెద్దాయన

16. చివర్ని కోల్పోయిన అందమైన యువతి

17. జంటపదంలో మొదటిసగం=రెండోసగం అయితే ఒక సగమే మిగిలింది.

18. స్థిరంగా ఉంటాన్ని ఇలా కూడా అంటారట

19. అవినీతిని అంటగట్టే శాఖ, చివర్ని కోల్పోయింది.

20. అటునుంచి ఇందులో పెరిగిన తాడిచెట్టు. 

21. తిరగబడ్డ బండితోలువాఁడు



నిలువు

1. మిట్టమధ్యానం ఇంట్లో ఎవరికీ తెలియకుండా ఈతకెళ్ళొచ్చి పట్టుబడ్డప్పుడు నాన్న పోసేది?

2. క్రిమిసంహారకాలు విచ్చలవిడిగా వాట్టం వల్ల బలి అయిన చిన్న పక్షి, అంతరించేస్తాయికి వచ్చినై

3. ఈ ఊరిని 8గాలి ఉరు* అంటారుట ఇంగ్లిషులో

4. దిన్ని బక్కెట్ల మీద బక్కెట్లతో నింపితేనే వాడుకోటానికి నీళ్ళు. 

7. ఎప్పుడూ వేపుడు కూరేనా? మన నలభీమ పాకంలో రాంములక్కాయ ... చేసేవిధానం రాసుకొచ్చాడు. అలా చేయొచ్చుగా?

9. చెఱువు/బావి/లంకెబిందెలతో సహితంగా ఇంటిని రాసిచ్చాట్ట ఒకతను

11. భార్యాభర్తలు కొబ్బరికాయ కొని ...కొట్టుకుని తింటారు, మనకెందుకుటా

13. రాజకీయ వినయకులు తరచుగా కరుచుకుంటుంటారు. సదరు *కరుచు*కుంటాన్ని ఇలా కూడ అనొచ్చుట - తలక్రిందులుగా

14. సేవకుడే కాస్త అచ్చుతప్పుతో స బదులు శ 

16. అచ్చెరువున అచ్చెరువున ఈ...న వికసించిన కమలం 
 

(చిన్న ప్రయత్నం మాత్రమే. సలహాలు సూచనలు ఎల్లప్పుడూ స్వాగతిస్తా )

Oct 7, 2020

శ్రీశ్రీ వ్యంగ్యం

శ్రీశ్రీ చమత్కారాలు కొన్ని బాగున్నా కొన్ని కాస్త ఇబ్బందిగా అనిపించాయి (నాకు)

అయన గొప్పతనన్ని ప్రశ్నించటం లెక వేలెత్తి చూపటం నా అభిమతం కాదు. కానీ ఆయన ఏవన్నా గొప్పే అనే మనస్తత్వం ఇబ్బందికరం.


ఉదాహరణకు -


మెదడుకు మేత -2

ఈసారి మెదడుకి మేత ఒకే ఒక విషయాన్ని గురించి, అ విషయం ఏమిటంటే: (ఔను. మీరు బాగా పోల్చారు) ఇండియా విదేశాంగ నీతి.

ఈసారి ప్రశ్నలకు జవబులివ్వబడవు. కారణం స్పష్టమే. వీటికి సరియైన జవాబు లివ్వడం మం తరం కాదు. ఏమో, మీరూ ప్రయత్నించి చూడండి. మీ జవాబులే రైటు కావచ్చు. అయితే వాటిని మాకు పంపించవద్దు, సరాసరి ఈ దిగువ చిరునామాకు పంపండి.

నెహ్రూ పాదుషా

కేరాఫ్ తాజ్‌మహల్, ఇండియా.


ప్రశ్న: కాశ్మీరు మధ్యవర్తిగా మిమ్మల్ని మిత్ర రాజ్యసమితి నియమిస్తే:

(అ) కాశ్మీరులో ఎన్ని నెలలు కులాసాగా తిరుగగలరు?

(ఆ) పాకిస్తాన్ నిర్దోషి అని ఎన్ని నిమిషాలలో ఋజువు చేయ్యగలరూ?

(ఇ) ఎన్ని టన్నుల ఆస్తిని మిత్రరాజ్య విమానాలలో పాకిస్తాన్‌కు చేరవెయ్యడనికి అనుమతించగలరు?


ముద్రణ: అరుణరేఖ మసపత్రిక, ఆగస్ట్ 1950.


పై వ్యంగ్యాన్ని బట్టి శ్రీశ్రీ అభిప్రాయం పాకిస్తాన్ చాలా మంచి దేశం. కాశ్మీర్ లో జరుగుతున్న మారణకాండకి పాకిస్తాన్ ని దోషిగా నిలబెట్టాల్సిన పని లేదు. అసలు పాకిస్తాన్‌కీ అక్కడ జరుగుతున్న దానికి సంబంధమే లేదు. 


భావజాలానికి బానిసత్వం నిలువెత్తు ఉదాహరణ - పై వ్యంగ్యం.

కమ్యూనిస్టులు ఇప్పటికీ అదే భావదారిద్ర్యంలో కొట్టుకుంటున్నారు. దౌర్భాగ్యం.



Oct 5, 2020

ఐక్య ఉపాధ్యాయ

 ఐక్య ఉపాధ్యాయ


యావత్ ఉపాధ్యాయులందరికీ *ఉపాధ్యాయ దినోత్సవ శుభాకాంక్షలు* Oct 05/2020.

ఉపాధ్యాయ దినోత్సవం సెప్టెంబరు 5 న. శ్రీ సర్వెపల్లి గారి పుట్టినరోజు. మరి అక్టోబరు 5న? ప్రపంచ ఉపాధ్యాయుల దినోత్సవం #ట


మా చిన్నప్పుడు, ఉపాధ్యాయ దినోత్సవానికి టిక్కెట్టు అమ్మేవారు, పావలాకి ఒకటి. ఆ వచ్చిన ఫండ్‌తో ఉపాధ్యాయులని సత్కరించటానికి ఉపయోగించేవాళ్ళు అనుకుంటా.


మా నాన్న గారు యునైటెడ్ టీచర్స్ ఫెడరేషన్ టీచర్స్ ట్రేడ్ యూనియన్ లో పీకల లోతుకు కూరుకుపోయి ఉండేవారు. ఒకానొక సమయంలో గుంటూర్ నుంచి మండలికి పోటీ చేస్తున్న శ్రీ MJ మాణిక్య రావు గారిని బలపరుస్తూ క్యాంపైన్ కి కూడా తిరిగారు. ఆయన గెలిచారనుకుంటా.


గుంటూరికి మేము మారిన తర్వాత ప్రతీ రోజూ యూటీయఫ్ కార్యాలయానికి విధిగా వెళ్ళేవారు. రిటైర్ అయ్యక కుడా వెళ్ళాటం ఆగలేదు. చివరికి చనిపోయే ముందు రోజుకూడా.


అదేదో ప్రీతి. రిటైర్మెంట్ ఫండ్ నుంచి కొంత యూటీయఫ్ కి ధారాదత్తం చేశారు.


యూటీయఫ్ వారిది ఒక పత్రిక వచ్చేది. *ఐక్య ఉపాధ్యాయ* దాని పేరు. అప్పట్లో ఆ పత్రికకి సంపాదకులు శ్రీ కేశవ రెడ్డి మాష్టారు. కేశవ రెడ్డి మాష్టారు మా నాన్న గారికి చిరకాల మిత్రులు. ఆప్తులు. వారూ మా నాన్న గారు ఒకే ఊరి నుంచి, ఎదురెదురు ఇళ్ళు. మా నాన్న గారి ఫస్ట్ పోస్టింగ్ దాచేపల్లి జిల్లా పరిషత్ ఉన్నత పాఠశాలలో చేరినప్పుడు శ్రీ కేశవరెడ్డి మాష్టారు అదే స్కూల్లో పని చేస్తుండటం కేవలం యాధృచ్చికం. కేశవరెడ్డి గారు అనేక విషయాలల్లో అనేక సందర్భలల్లో మానాన్న గారికి అండగా నిలిచారు. యూటీయఫ్/కమ్యూనిస్ట్ భావజాలానికి పడ్డ పునాదుల్లో కేశవరెడ్డి గారి ప్రభావం ఉందనక తప్పదు.


ఆరోజుల్లో ఐక్య ఉపాధ్యాయ పత్రిక శాశ్వత చందాదారుడిగా ప్రతీ నెలా ఆ పత్రికని ఆందుకోవటం, సంపాదకీయం చదవటం అనేది ఒక నెలనెలా జరిగే ఓ తంతు. ఆ మాటకొస్తే మా నాన్న ఇండియా టుడే, ఫ్రంట్‌లైన్, ఇల్లస్ట్రేటెడ్ ఇత్యాది లాంటి పత్రికలు తెప్పించి చదువుతుండేవారు. ఏ పత్రికైనా - ఆసక్తి మాత్రం ఒక్కటే.


ఒక ఉపాధ్యాయుడికి కావాల్సిన/ఉండవలసిన అత్యంత ముఖ్యమైన గుణాలులో కొన్ని - పరిశీలన/అవగాహన

ఇవి ఉపాధ్యాయుడిని ఎలివేట్ చేస్తాయి. ఇవి వ్యక్తిత్వ వికాసానికి పునాదులు అని అప్పట్లోని ఉపాధ్యాయులు చెప్పి ఆచరిస్తుండేవాళ్ళు.


ఐక్య ఉపాధ్యాయ అనే పత్రిక ముఖం పైన చివరలో ఒక బోడిగుండాయన బొమ్మ ఉండేది. ఆరోజుల్లో ఆయన ఎవరూ అనే జిజ్ఞాస ఉన్నా పెద్ద పట్టించుకోలేదు. ఈ పోస్ట్ రాస్తున్న సందర్భంలో ఆయన ఎవరూ అని వెతికితే, ఆయన పేరు చెన్నుపాటి లక్ష్మయ్య అని తెలుసుకున్నాను. 


చెన్నుపాటి లక్ష్మయ్య ఉపాధ్యాయ నేత. ఆయన తన జీవిత పర్యంతం ఉపాధ్యాయుల హక్కుల కోసం పోరాడిన యోధుడు


అలాగే ఐక్య ఉపాధ్యాయ ప్రధాన సంపాదకుడు మైనేని వెంకటరత్నం. 


ఐక్య ఉపాధ్యాయ పత్రిక ఆరంభం నుండి తన మరణం వరకు ప్రధాన సంపాదకులుగా పనిచేశారు.


ఈ పోస్ట్ సందర్భంలో ఐక్య ఉపాధ్యాయ పత్రిక గురించి వెతికితే ఆన్లైన్లో దొరికింది.


జనవరి 2020 సంచిక ఓపెన్ చేశాను. *మహోన్నత వ్యక్తి మైనేని" అనే ఒక వ్యాసం. వ్యాసకర్త మా నాన్న గారికి అత్యంత ఆప్త మిత్రులు యూటీయఫ్ సీనియర్ నాయకులు శ్రీ యం.ఎ.కె దత్తు గారు.


ఉపాధ్యాయులు సంఘటితం అవ్వటం అనేక విషయాలపై పోరాటాలు చేయడం - గొప్ప విషయాలు.


ఉపాధ్యాయ దినోత్సవం సందర్భంగా శుభ్కాకాంక్షలు.



Oct 4, 2020

ఒక చిన్న ప్రొజెక్ట్ వర్క్/ఉద్యోగావకాశం Job/Project work offer

ఒక చిన్న ప్రొజెక్త్ వర్క్/ఉద్యోగావకాశం

అవకాశం

నా దగ్గర ఒక ఆలోచన ఉన్నది. సదరు ఆలోచనని అభివృద్ధి చెసేందుకు నాకు ఇంజనీరింగ్ ఫైనల్ ఇయర్ చదివే కోడింగ్ వచ్చిన విద్యార్థి/ర్థులు ఒకరు లేక ఇద్దరు కావాలి.


ఉండాల్సిన అర్హతలు:

ఆకళింపు

కొంచెం సహనం

ఆలోచించేతత్వం


ఉండకూడనివి:

అసహనం

సోమరితనం


ఏమేమి వచ్చుండాలి?

Java/Python/Java Scripting/Objective C


నేనేమి ఇవ్వగలనూ?

Project Work చేశాడనే సర్టిఫికెట్

కొంత విత్తం. ఎంతా అనేది పరీస్థితిని బట్టి.


నా బ్లాగు చదివే మిత్రులలో ఎవరికైనా పైన చెప్పిన క్వాలిఫికేషన్ ఉన్న పిల్లలు తెలిస్తే ఇక్కడ ఓ కామెంట్ పెట్టండి కాంటాక్ట్ సమాచారంతో - సదరు కామెంటుని నేని సంగ్రహించి పబ్లిష్ చేయకుండా తీసివేస్తాను.


Folks, I have small project in my mind. I am looking for college going kid who is in need of project work and who wants to make little pocket money. If the folk deliver me what I am looking for, I will keep getting simple projects again.

I need someone who is in the final year of college 

must haves:

good listening skills

good levels of patience

must not have:

short temperment

laziness

must know:

Java/Python/Java Script/Objective C.

what I can offer:

a deserving candidate will get project work certificate.  I am willing to pay stipend.

Sep 29, 2020

భాజపా తన బొందని తానే పెట్టుకుంటున్నదని నా భావన

నిన్ననో మొన్ననో ఈ వార్త చూశాను

"భారతీయ జనతా పార్టీ (భాజపా) తన జాతీయ నూతన కార్యవర్గాన్ని ప్రకటించింది. ఇందులో తెలుగు రాష్ట్రాలకు చెందిన డీకే అరుణ, పురందేశ్వరిలకు చోటు దక్కింది. తెలంగాణకు చెందిన డీకే అరుణను జాతీయ ఉపాధ్యక్షురాలిగా ఆ పార్టీ జాతీయ అధ్యక్షుడు జేపీ నడ్డా నియమించారు. జాతీయ ప్రధాన కార్యదర్శిగా పురందేశ్వరిని నియమిస్తూ శనివారం ఉత్తర్వులు జారీ చేశారు. తెలంగాణ భాజపా రాష్ట్ర మాజీ అధ్యక్షుడు డాక్టర్‌ కె.లక్ష్మణ్‌ను ఓబీసీ మోర్చా జాతీయ అధ్యక్షుడిగా నియమితులయ్యారు. ఏపీకి చెందిన సత్యకుమార్‌ జాతీయ కార్యదర్శిగా యథావిధిగా కొనసాగనున్నారు."


భాజపా తన బొంద తానే పెట్టుకుంటున్నదని అనిపించింది. పైన ప్రకటించిన ఇద్దరు వ్యక్తులూ భాజపా భావజాలంతో రాజకీయ ప్రస్థానాన్ని మొదలు పెట్టిన వాళ్ళు కారు. ఒకరు మరీ దారుణంగా కాంగ్రేస్ భావజాలంలోంచి వస్తే మరొకరు అవకాశావాద రాజకీయాలతో నెట్టుకుంటూ కేవలం పదవులే ముఖ్యంగా కేవలం లైంలైట్లో ఉంటానికే వచ్చిన వ్యక్తి. 


ఇలాంటివారికి పార్టీలో ప్రధాన్యత ఇస్తే ఎప్పటినించో పార్టీనే అంటిపెట్టుకుని భావజాలాన్ని నరనరాన జీర్ణించుకున్న వ్యక్తులు ఏమి చేయాలీ? వారికి గుర్తింపెదీ?


భాజపా తన బొందని ఈరకంగా తానే పెట్టుకుంటున్నదని నా భావన


Sep 27, 2020

కీ|శే|| బాలసుబ్రహ్మణ్యం గారితో ముఖాముఖి ఆకాశవాణిలో (రిప్లే)

 కీ|శే|| బాలసుబ్రహ్మణ్యం గారితో ముఖాముఖి ఆకాశవాణిలో


నిన్న మధ్యాహ్నం అనుకుంటా ఆకాశవాణిలో బాలసుబ్రహ్మణ్యం గారితో ముఖాముఖీ (రిప్లే) వచ్చింది. నిజం చెప్పాలంటే ఎటువంటి నాన్-సెన్స్ లేకుండా సుత్తిలేకుండా ఎంతో హుందాగా చక్కటి భాషతో స్లోగా ఉంటుంది ఆకాశవాణి. 

అదేకోవకు చెందింది ఈ ముఖాముఖీ కార్యక్రమం. శ్రీ మోహన కృష్ణ గారు బాలసుబ్రహ్మణ్యం గారితో ముఖాముఖీ కార్యక్రమాన్ని ఎంతో హుందాగా నిర్వహించారు. బాలసుబ్రహ్మణ్యంగారితో ముఖాముఖీ ఒక గంటలో తేలేది కాదు. ఆయన పాడిన పాటలు ఎన్నో పాటతో ఆయన ప్రయాణానికి ఎన్ని ఏళ్ళో - ఆసారాన్నంతా ఒక గంటలోకి కుదించటం ఆ దేవుడి వల్ల కూడా కాదు. 


బాలసుబ్రహ్మణ్యం గారికి లలిత గీతాల పోటీలో బహుమతి రావతం, ఆ నాటి జ్ఞాపకాలు అయన పంచుకోవటం బాగుంది. అయితే మోహన కృష్ణగారు చక్కటి ప్రశ్న వేయటం కొస పెరుపు - మీరు పాడిన పాట ఎదీ? అని. బాలసుబ్రహ్మణ్యం గారు వారి తండ్రిగారు రాసిన పాట అని ఆ పాటన తడమటం -"పాడవే వల్లకీ పాట". తండ్రిగారు రాసిన పాటను ఆయన పాడటం ఎంత గొప్ప అనుభూతి? బాలసుబ్రహ్మణ్యంగారు కాలంలో కలసి పోయినా వారి పుత్రుడు తాత గారి రచనలని, తంద్రి గారి రచనలని సెకరించి అచ్చు వేయిస్తే అంత గొప్పగా ఉంటుందో అని నా మనసులో ఓ ఆలోచన స్పురించింది, అది ఇప్పటికే జరిగుండకపోతే.


ముఖాముఖీ అనేక పాటలని స్పృశించకపోయినా మోహనకృష్ణ గారు చక్కగా తన స్టైల్లో ప్రశ్నలు అడగతం, బాలసుబ్రహ్మణ్యం గారు న్వ్వుతూ జవాబులు చెప్పటం - వీనుల విందుగా అనిపించింది.



కొన్ని మెరుపులు -

"అబ్బాయ్ మురళీకృష్ణ సరస్వతీ  పుత్రులైన శ్రీ బాలమురళీకృష్ణ గారి దగ్గర నువ్వు అంతేవాసివి - నేను అంతే" ఎంత నిజాయితీగా చెప్పుకున్నారో?


Sep 26, 2020

దొరకునా ఇటువంటి సేవా

మధ్యానం బాధ లోంచి  బయట పడటానికి ఛానెల్స్ బ్రౌజ్ చేస్తుంటే జెమినీలో శంకరాభరణం తగిలింది.

సామజ వర గమన పాట వస్తున్నది అప్పటికే


బహుశా నా ఒకటో లేక రెండో తరగతిలో వచ్చిందనుకుంటా శంకరాభరణం.

చూసిన ప్రతిసారీ ఓకొత్త అనుభూతి అనుభవం

నా దృష్టిలో గొప్పనటుడు శ్రీ అల్లు రామలింగయ్య గారుశంకరాభరణం నిలువెత్తు ఉదాహరణ.

నా దృష్టిలో గొప్ప నటుడు శ్రీ జొన్నలగడ్డ సోమయాజులు గారు.

నా దృష్టిలో గొప్ప నటి నిర్మలమ్మ.

నా దృష్టిలో గొప్ప నటుడు చంద్రమోహన్.

నా దృష్టిలో గొప్ప నటుడు సాక్షి రంగారావు.


సరే సినిమాలోకొస్తే సామజ వర గమన పాటప్రాణం వేటూరిఊపిరి బాలు జానకి.

ప్యూర్ వేటూరి మాయాజాలం బాలు దాన్ని తారాస్తాయికి తీసుకెళ్ళటం -



"ఆమని కోయిల

ఇలా 

నా 

జీవన వేణువులూదగ

ఆమని 

కోయిల 

ఇలా 

నా జీవన వేణువులూదగ

మధురలాలసల 

మధుపలాలనల 

మధురలాలసల 

మధుపలాలనల 

పెదవిలోని మధువులాను రసముపూని జతకు చేరగా 


వేసవి రేయిలా 

ఇలా 

నా 

ఎదలో మల్లెలు చల్లగ 


మదిని కోరికలు 

మదన గీతికలు 

మదిని కోరికలు 

మదన గీతికలు 

పరువమంత విరుల పానుపు పరచి నిన్ను పలకరించగా"


పాటని అనుభవిస్తూ పాడితే ఎలా ఉంటుందో  పాట ఒక మైలురాయి.


ఇంతలో సినిమా చివరకు వచ్చేసింది.


"దొరకునా ఇటువంటి సేవ"

సన్నివేశం విశ్వనాథ్ గారు ఎలా చిత్రీకరించారు నాటకీయత  ఇవన్నీ పక్కన పెడితే!


వేటూరి ఆలోచనా తీరుజంధ్యాల మాటబాలసుబ్రహ్మణ్యం పాటవిశ్వనాథ్ దర్శకత్వం -


ఎన్నో ఏళ్ళ తర్వాత కచేరీకి అంగీకరించిన  సంగీత శాస్త్రవేత్త.

కచేరికి వేంచేసి అతని పేరు మీద వెలసిన క్షేత్రంలోకి ఆశ్చర్యపోయి వచ్చి - 

పాశ్చాత్య సంగీతపు పెనుతుపానుకి రెపరెపలాడుతున్న సత్-సాంప్రదాయ సంగీతపు జ్యోతిని ఒక కాపుకాయటానికి తనచేతులు అడ్డుపెట్టిన దాత ఎవరో వారికి శత సహస్ర వందనాలు అర్పిస్తున్నానుసుష్కించిపోతున్న భారతీయ సంస్కృతీసాంప్రదాయాలని పునరుద్ధరించటానికి నడుంకట్టిన  మహా మనీషీకి శిరస్సు వంచి పాదాభివందనం చేస్తున్నానుకళ జీవకళఅజరామమైనదిదీనికి అంతం లేదునిరాదరణ పొందుతున్న  కళని పోషించటానికి కోటికి ఒక్క వ్యక్తిముందుకొచ్చినా సరే -  అమృతవాహిని అనంతగా ఇలా ప్రవహిస్తూనే ఉంటుందిమనిషి నిలువెత్తు ధనంసంపాదించినా -

దొరకునా ఇటువంటి సేవ

నీ పద రాజీవముల చేరు 

నిర్వాణ సోపాన మధిరోహణము 

సేయు త్రోవ


రాగాలనంతాలు నీ వేయి రూపాలు

భవరోగ తిమిరాల పోకార్చు దీపాలు

రాగాలనంతాలు నీ వేయి రూపాలు

భవరోగ తిమిరాల పోకార్చు దీపాలు


నీ పాదాలు చేరటానికి నిచ్చెన సేవ

తిమిరాలను పోకార్చు దీపాలు - 

తిమిరం - చీకటి

పోకార్చుట - 'పొకారు or పోకారు [Tel.] v. n. To be ruined, నాశమగుపొకార్చుపొకారుచుపోకారుచు or పోకార్చుpokārṭsu. To kill or ruin, to render powerless, to strike with stupor, ".. కానకకన్నమాసుతుబొకారిచియిన్నియుమిధ్యచేసితే."'


జీవితాన్ని మింగేసిన చీకట్లను నాశనం చేసే దీపం సేవ.. 



బాలసుబ్రహ్మణ్యం  పాటకి నిజంగా ఊపిరి!

నా కళ్ళు చెమర్చాయి.


సినిమా ఇండస్ట్రీ అంతా హీరో చుట్టూతా పరిభ్రమిస్తూ ఉంటుంది ముఖ్యంగా తెలుగులో.


రచయితకి గుర్తింపు ఉండదు.

పాటకర్త  ఎవరో తెలియదు.

వీటి ప్రస్తావన ఎక్కడా ఉండదు.

దౌర్భాగ్యం

పై మాటలు ఎంత లోతుగా ఉన్నాయీదర్శకుడి తపనని గుర్తెరిగిన రాసిన రాత - శంకరాభరణం మాట కర్త జంధ్యాల.

చరిత్రలో చిరస్థాయిగా నిలిచిన మాటలు పాటలు నటన దర్శకత్వం.

Sep 25, 2020

గాయకుడు పాటకు ఊపిరి, కవి పాటకు ఆత్మ

 


ఊహ తెలిసినప్పటి నుంచి రేడియోలో ఆయన పాటలు వింటూ పెరిగినవాళ్ళకు ఆయన పాట జీవితంలో ఓ భాగం అయిపోతుంది. మనసులో ఆయన ఒక చోటు చేసుకుని కూర్చున్నట్టే ఉంటుంది. అమ్మా నాన్నా అన్నా చెల్లీ లతో పాటు ఆయన ఒక కుటుంబ సహ్యుడే. బాధల్లో *దుఖఃభరిత పాటల* ఓదార్పు. ఆనందంలో *ఉత్సాహాన్ని రేకెత్తించే పాటలు* వాటంతట అవే పెల్లుబుకుతాయి. ఈ పాటలన్నీ మనసొత్తు అయినట్టు. ఆ పాడినవాడు మనోడన్నట్టు మనకోసమే అన్నట్టు.


గాయకుడు పాటకు ఊపిరి

కవి పాటకు ఆత్మ


పాట నిలిచినంత కాలం గాయకుడికి మరణం లేదు

రచయితకీ మరణం లేదు


కానీ ఒక వ్యక్తిగా కరోనాతో ఆయన కాలం చేయటం బాధగా ఉంది.


ఆయన గళంలోంచి వచ్చిన ఈ పాట మనసులో తిరిగుతోంది -


ఎక్కడో దూరాన కూర్చున్నావు

ఇక్కడి మా తలరాతలు రాస్తున్నావు 

చిత్రమైన గారడి చేస్తున్నావు

తమాష చూస్తున్నావు సామీ



లేనిపోని భ్రమలెన్నో కలిగిస్తావు

మమ్ము తోలుబొమ్మలను చేసి ఆడిస్తావు 

లేనిపోని భ్రమలెన్నో కలిగిస్తావు

మమ్ము తోలుబొమ్మలను చేసి ఆడిస్తావు 

అంతా మా సొంతమని అనిపిస్తావు

అంతలోనే మూడునాళ్ళ ముచ్చటగా సామీ 


ఎక్కడో దూరాన కూర్చున్నావు

ఇక్కడి మా తలరాతలు రాస్తున్నావు 

చిత్రమైన గారడి చేస్తున్నావు

తమాష చూస్తున్నావు సామీ

 

ఎక్కడో దూరాన కూర్చున్నావు 


పెరుగుతుంది వయసనీ అనుకుంటాము

కాని తరుగుతుంది ఆయువని తెలుసుకోము 

పెరుగుతుంది వయసనీ అనుకుంటాము

కాని తరుగుతుంది ఆయువని తెలుసుకోము 

కళ్ళు తెరిచి నిజమేదో తెలిసే లోగా 

మా కళ్ళముందు మాయతెరలు కప్పేస్తావు సామీ 


ఎక్కడో దూరాన కూర్చున్నావు

ఎక్కడో దూరాన కూర్చున్నావు 

ఎక్కడో దూరాన కూర్చున్నావు సామీ

ఎక్కడో దూరాన కూర్చున్నావు


Sep 20, 2020

ఆదివారం పాటలతో ప్రయాణం

ఆదివారం పని చేయటం అంత ఈజీకాదు.

కాస్త ఊరట కోసం ఆకాశవాణి పెట్టాను.

ఒక్కో పాట నన్ను పరుగెత్తేలా చేస్తున్నాయి

"అలుపన్నది ఉందా

ఎగిరే అలకు

ఎదలోని లయకు

అదుపన్నది ఉందా

కలిగే కలకు

కరిగే వరకు

మెలికలు తిరిగే నది నడకలకు

మరి మరి ఉరికే మది తలపులకు


నా కోసమే చినుకై కరిగి

ఆకాశమే దిగదా ఇలకు

నా సేవకే సిరులే చిలికి

దాసోహమే అనదా వెలుగు

ఆరారు కాలాల అందాలు బహుమతి కావా

నా ఊహలకు

కలలను తేవా నా కన్నులకు


నీ చూపులే తడిపే వరకు

ఏమైనదో నాలో వయసు

నీ ఊపిరే తగిలే వరకు

ఎటు ఉన్నదో మెరిసే సొగసు

ఏడేడు లోకాల ద్వారాల తలుపులు తెరిచే

తరుణం కొరకు

ఎదురుగా నడిచే తొలి ఆశలకు"


- సిరివెన్నెల

గాయం చిత్రం నుంచి 


తేలిక పదాలతో అల్లిన ఈ పాట మొదలు సిరివెన్నెల మార్క్ ని ఆవిష్కరిస్తుంది. 

ఈ పాటని అనుభవించెలోపు ఇంకోపాట మొదలైంది


ఓ కన్నె పువ్వా కాటేసి పోనా - మొదలులోనే వేటురి బాణి అర్థమైపోయింది.


"ఓ కన్నె పువ్వా కాటేసి పోనా

నా తేనే బువ్వా భోంచేసి పోరా


శివ శివా ఏంటమ్మా నాలో ఇంత కువ కువా

హర హరా అందాలకెందుకింత పెర పెరా

కనుల నిదుర కరువై అది పగటి కలల పరమై

పరువమేమో బరువై అది మరువలేని దరువై

ఎల్లకిల్లా పడ్డదమ్మా ఎన్నెల బిళ్లా

తెల్ల చీర నల్లబోయే పొద్దుటికల్లా

తొలి చూపులో...

తొలి చూపులో చలి కాచుకో పులకింతల పున్నమి వేళా"

ఇంక చెప్పేదేవుందీ


తేనె బువ్వలు

మల్లె బువ్వలు 

వేటూరి శృంగారంలోచి ఉద్భవించిన ఊహలే కదా?


తర్వాతి పాట గులాబి చిత్రం నుంచి

ఈవేళలో నీవు ఏంచేస్తు ఉంటావో 

సునీతకి సినిమా ఇండస్ట్రీలో ఒక స్థానాన్ని ఇచ్చిన పాట.


"ఈ వేళలో నీవు ఏం చేస్తూ ఉంటావో

అనుకుంటూ ఉంటాను ప్రతి నిమిషమూ నేను

నా గుండె ఏనాడో చేజారి పోయింది

నీ నీడగా మారి నావైపు రానంది

దూరాన ఉంటూనే ఏం మాయ చేశావో"


సిరివెన్నెల గారి ఈ ఊహ అద్భుతమైన ఊహ. నా గుండె నీ నీడగా మారిపోయింది. మనిషి నుంచి నిడని వేరు చేయలేం అతను ఆమె దగ్గరకి చేరితే తప్ప.

అబ్బా ఇకచాల్లే ఈపాటల పదనిస అనుకుంటుండగానే తర్వాత మొదలైంది.

పాపం రాజేంద్రప్రసాద్ ని మింగేసిన సినిమా రాంబంటు.

ఇందులోని ఈ పాట - 


"సందమామ కంచమెట్టి, సన్నజాజి బువ్వపెట్టి

సందెమసక చీరగట్టి, సందుచూసి కన్నుగొట్టి"

చెప్పకనే చెబుతుంది ఇది వేటూరి బాణి అని

చందమా కంచంలో సన్నజాజి బువ్వ. మళ్ళీ అదే గోల.

సందె మసక చీకటి అంటే కనిపించీ కనిపించని చీకటిని చీరగా చుట్టిందట శృంగార తార. అతన్ని కవ్వించటానికి అందాలని ఆరబోస్తూ కన్ను కూడా కొట్టిందట పాపం.

కానీ అతనేమో - 

"భద్రాద్రిరామయ్య పెళ్ళికొడుకవ్వాల, సీతలాంటినిన్ను మనువాడుకోవాల

బెజవాడ కనకదుర్గమ్మ బాసికాల్దేవాల, బాసరలో సరస్వతి పసుపుకుంకుమలివ్వాల

ఏడుకొండలసామి ఏదాలుజదవాల, సెవిటిమల్లన్నేమో సన్నాయి ఊదాల

అన్నవరం సత్తన్న అన్నవరాలివ్వాల, సింహాద్రప్పన్న సిరి(జాస?)లివ్వాల"

అంటూ లెక్కలు కడుతున్నాడు ముడుపుల మూటలు చుడుతున్నాడు ఆమెని ఏ మాత్రమూ పట్టించుకోకుండా

ఆమేమో పెదవితేనెలందిస్తే పెడమోములు, తెల్లారిపోతున్న చెలినోములు

పిల్లసిగ్గు చచ్చినా, మల్లెమొగ్గ విచ్చినా

అంటూ వేడి నిష్టూరాలు పోతున్నది.


అనురాగ్ కశ్యప్ - గొప్ప స్త్రీవాది

ఆదివారం హాస్యోక్తి:


"నాకు తెలిసినంతవరకూ నువ్వు గొప్ప స్త్రీవాదివి"

- తాప్సీ అనురాగ్ కశ్యప్ ని ఉద్దేశించి.


Sep 19, 2020

బుచ్చిబాబు చివరకు మిగిలేది నాటకం

 ఎందరో రచనలు చేస్తారు.

కొన్ని రచనలే లోతుగా స్పృశిస్తాయి.


"ఇతరులతో సంపర్కం వదులుకుని, ఏకాంతంగా మనం తెలుసుకున్న జీవిత రహస్యాన్ని యధార్థం అని నమ్మి సమాధాన పరుచుకోవడం, సంఘంతో నిమిత్తం వున్న మనిషికి చేతకాదు కాబోలు. చరిత్ర కట్టుకున్న ప్రాచీన పునాదులు, సంఘం పాతుకున్న మట్టి విత్తనాలు, వాటిని మినహాయిస్తే మానవుడిలో చివరకు మిగిలేది ఏమిటి?"

ఈ ప్రశ్న అంత సులభంకాదు జవాబు చెప్పటానికి.


ఒక వ్యక్తి భావుకతని అతని స్థాయికి వెళ్ళి అతనితో ప్రయాణించి అతన్ని గమనిస్తూ వెళ్తే కానీ అర్థం కాదు. ఆవిష్కారం కాదు.


దయానిధి అనే భావకుడితో ప్రయాణం చేసేలా చేశాడు ఆ పాత్ర సృష్టికర్త *బుచ్చిబాబు* *చివరకు మిగిలేది* అనే తన నవలలో


చివరకు మిగిలేది నవలని ఎప్పుడో చదివిన జ్ఞాపకం. వయసులో ఉన్నప్పుడు ఉన్న వేడి ఆలోచనా ధోరణీ చపున ఎగసి పడే ఆవేశం నలభైల్లో పడ్డాక పడి విరిగిన అలలా అయిపోయింది.


నాలో నా ఆలోచనలలో కలిగే మార్పులు నాకు సుస్పష్టంగా తెలుస్తున్నాయి.



పోయినవారమో అంతకముందో ఏదో పనిలో ఉండి ఆకాశవాణి పెట్టుకుని వినటం మొదలుపెట్టాను. చివరకు మిగిలేది నాటకం నన్ను కట్టేసింది. దానిలోని పాత్రలు అద్భుతంగా మలచారు నండూరి రామకృష్ణ గారు మరియూ పాలగుమ్మి పద్మరాజు గారు.


ఈ నాటకం నన్ను మరోమారు చివరకు మిగిలేది నవల చదివేలా ప్రోత్సహించింది.


చూద్దాం ఆలోచనలు భావాలు ఎలా తిరుగుతాయో.


Sep 16, 2020

జయ ప్రకాశ్ రెడ్డి

జయ ప్రకాశ్ రెడ్డి


మనాన్న గారు హిందూ కళాశాలలో పట్టభద్రుడైయ్యాక పోస్ట్ గ్రాడ్యుయేషన్ చేద్దామని ఆంధ్రా విశ్వవిద్యాలయానికి వెళ్ళి ఒక ఏడాది చదివి మధ్యలో జై ఆంధ్రా ఉద్యమం అంటూ సమ్మెలు హర్తాళ్ళు అయ్యాక మధ్యలోనే ఆపివేసి బందరులో బిఈడి చేరినప్పుడు ఆయనకి సహాధ్యాయీ జయప్రకాశ్ రెడ్డి గారు. మా నాన్న గారికి కూడా నాటకాల పిచ్చి ఉండటం. డిగ్రీ రోజుల్లో ఒకె నాటకాన్ని అయిదు రోజులు ప్రదర్శించటం. ఆ నాటకం పేరు ఒథెల్లో అవటం. అదీ ఇంగ్లీషులో అవ్వతం. ఆయన డిగ్రీ సర్టిఫికెట్ లో "Talented Actor" అని ఉండటం - గొప్పగా చెప్పుకునే వాడు నాన్న.


జయప్రకాశ్ రెడ్డి గారు మా నాన్న గారు ఒరేయ్ ఒరేయ్ అనుకునే స్నేహితం.


ఓ రోజున నాన్న సమరసింహారెడ్డి సినిమాకి వెళ్దాం పదా అని లాక్కెళ్ళారు. బాలకృష్ణ సినిమాలు థియేటరుకి వెళ్ళి చూసినవి 4 మాత్రమే. ఏంటినాన్నా బాలయ్య సినిమకి లాక్కుపోతున్నావ్ అని ఏడుస్తూ మూలిగితే నా మిత్రుడు జయప్రకాశ్ రెడ్డి అందులో గొప్పగా నటించాడు. వాడికోసం అని చెప్పుకొచ్చాడు నాన్న.


సమరసింహారెడ్డి సినిమా చూట్టం జయప్రకాశ్ రెడ్డి గారి నటన చూసి ఆయనే నటించినంతగా పొంగిపోవటం ఇంటికొచ్చాక ఒరేయ్ అంటూ ఆయనతో మాట్లాడటం. నాన్న గొప్పగా పొంగిపోయాడు - అదిగో వాడే నా మిత్రుడు అంటూ.


టీచర్ల బృందంలో బాగా నలిగిన నాటకాలు కొన్ని. ఈ ఇద్దరు మిత్రులూ కొన్ని నాటకాల గురించి మాట్లాడుకునే వాళ్ళు. మరో మొహంజో దారో గురించి మధ్యలో వచ్చేది. జయప్రకాశ్ రెడ్డి గారి అలెక్జాండర్ గురించి మాట్లాడుకునే వారు.


జయప్రకాశ్ రెడ్డి గారు స్క్రీన్ మీద ఎంత గంభీర్యంగా ఉన్నా నిజ జీవితంలో చాలా సౌమ్యంగా మాట్లాడేవారు. ఎంతో సాఫ్ట్ గా మాట్లాడేవారు. చిన్నా పెద్ద అని లేకుండా అందరితో బహు సరళంగా మాట్లాడేవారు. మా నాన్న లాగానే.


ఆయన కాలం చేశారనే వార్త నన్ను కలచి వేసింది.


నటుడికి చావుండదు అని నా అభిప్రాయం.


Sep 14, 2020

మొదటి రెండు ఖాళీలు ఒకే అక్షరంతో పూరించండి

 వాట్సప్ లో వచ్చిన ఈ పజిల్ కూడా ఆసక్తికరంగా ఉంది 👇.

————————————-
WhatsApp msg :-👇
————————————-
Forwarded
“మొదటి రెండు ఖాళీలు ఒకే అక్షరంతో పూరించండి
> ఉదాహరణకు: - - లీ, సిసిలీ

> 1. ➖➖యి
> 2. ➖➖లు
> 3. ➖➖న
> 4. ➖➖త
> 5. ➖➖జు
> 6.➖➖ రం
> 7. ➖➖న
> 8. ➖➖ధ
> 9. ➖➖గం
> 10. ➖➖యి
> 11. ➖➖లు
> 12.➖➖ కారం
> 13. ➖➖త్సుడు
> 14. ➖➖ఆట
> 15. ➖➖ని
> 16. ➖➖ద్రి
> 17. ➖➖ట
> 18.➖➖పు
> 19. ➖➖లు
> 20. ➖➖మంత్రం
> 21. ➖➖బసవన్న
> 22. ➖➖పట్టు
> 23.➖➖త
> 24.➖➖నం
> 25. ➖➖లు. “
————————————

అందించిన విన్నకోట వారికి కృతజ్ఞతలు